Efiopiya Federativ Demokratik Respublikasının nümayəndə heyəti Azərbaycan Prokurorluğunun fəaliyyəti barədə məlumatlandırılıb
177 ölkə üzrə 350 mindən artıq üzvü olan dünya prokurorlarının ilk və yeganə qlobal təşkilatı olan Beynəlxalq Prokurorlar Assosiasiyasının (BPA) İcraiyyə Komitəsinin 58-ci iclası, İllik Konfransı və Ümumi Yığıncağı 2024-cü ilin sentyabr ayının 28-dən oktyabr ayının 2-dək paytaxtımız Bakı şəhərində keçirilib.
95 ölkədən 465-dən artıq xarici qonaqların qatıldığı Beynəlxalq Prokurorlar Assosiasiyasının Bakıdakı tədbirlərində Efiopiya Federativ Demokratik Respublikasının Ədliyyə Nazirliyinin Dövlət naziri Tesfaye Wakjiranın rəhbərlik etdiyi nümayəndə heyəti də iştirak edib.
Bakıya səfər çərçivəsində Efiopiya Federativ Demokratik Respublikasının Ədliyyə Nazirliyinin Dövlət nazirliyinin əməkdaşları 2024-cü ilin sentyabr ayının 28-də Baş Prokurorluğun inzibati binalar kompleksində olublar.
Qonaqlar Baş Prokurorluğun Elm-Tədris Mərkəzinin rəisi Talıb Cəfərovun və şöbə rəisi Nigar Qələndərlinin müşayiəti ilə Baş Prokurorluğun inzibati binalar kompleksində yerləşən Ulu Öndər Heydər Əliyevin əziz xatirəsinə həsr edilmiş guşə, 44 günlük Vətən müharibəsinə həsr olunmuş tarixi-memorial qalereya, Baş Prokurorluğun kitabxanaları, mühazirə və praktiki məşğələlər auditoriyaları, konfrans və iclas zalları, kriminalistika otaqları ilə yaxından tanış olublar.
Efiopiya Federativ Demokratik Respublikasının nümayəndə heyəti ilə Azərbaycan Respublikası Baş prokurorunun müavini cənab Elmar Camalovun rəhbərliyi ilə görüş keçirilib, ölkələrin hüquq mühafizə orqanları arasında perspektivdə əməkdaşlıq əlaqələrin gücləndirilməsi istiqamətində söhbət aparılıb.
Azərbaycan Prokurorluğunun fəaliyyətini əks etdirən Mərkəzin Stratejı planlaşdırma və risklərin müəyyən edilməsi şöbəsinin böyük prokuroru Nigar Əskərovanın ingilis dilində keçirtdiyi təqdimat qonaqlar tərəfindən böyük maraqla qarşılanıb və qonaqlara təqdimat materialları rəqəmsal daşıyıcılarda təqdim olunub.
Sonda Efiopiya Federativ Demokratik Respublikasından gələn qonaqlarla xatirə fotoşəkili çəkilib.
