Prokurorluq işçiləri ekoloji hüquqpozmalarla mübarizə sahəsində tədris tədbirinə cəlb edilib
Ekoloji hüquqpozmalarla qarşı mübarizənin davamlı olması, bu sahədə müasir çağırışlara uyğun effektiv mexanizmlərin tətbiq edilməsi xüsusi əhəmiyyət kəsb edir.
Ölkəmizin COP29-a sədrliyi ilə əlaqədar prokurorluq orqanları tərəfindən müxtəlif istiqamətlərdə tədbirlər keçirilir.
Bu çərçivədə cari ilin mart ayının 10-dan 18-dək Baş Prokurorluğun Elm-Tədris Mərkəzinin təşkilatçılığı ilə prokurorluq işçiləri üçün “Ətraf mühitin mühafizəsi və ekoloji hüquqpozmalarla mübarizə” mövzusunda təlim təşkil edilib.
Prokurorluq işçilərinin iş vaxtında məşğulluğu nəzərə alınaraq, təlim üzrə məşğələlər internet üzərindən Mərkəzin “Distant tədris” platforması vasitəsi ilə distant təhsilin sərbəst rejimində keçirilib.
Tədbirdə təlimçi qismində müvafiq sahə üzrə vəsait hazırlamış Mərkəzin əməkdaşları iştirak etmiş, elektron mühazirə formatında keçirilmiş məşğələlərdə ətraf mühitin mühafizəsinin qanunverici əsasları, təbiətdən istifadə və ekoloji təhlükəsizlik qaydaları əleyhinə olan xətalara görə inzibati məsuliyyət, ekoloji cinayətlərə görə cinayət məsuliyyəti və digər aktual məsələlər tədris obyekti olmuşdur.
Təlimin dinləyicisi olmuş 82 nəfər platformada yaradılan şəxsi kabinetlərə fərdi istifadəçi adı və paroldan istifadə etməklə daxil olaraq tədris materiallarını öyrənmiş və mövzu üzrə sualları cavablandırmaqla bütün mərhələləri müvəffəqiyyətlə bitirmişlər.
