PROQRAM VƏ PLANLARIN İCRASI

Baş Prokurorluğun Elm-Tədris Mərkəzi (bundan sonra – Mərkəz) hesabat dövründə Azərbaycan Respublikasının Konstitusiyasını, beynəlxalq müqavilələri, normativ hüquqi aktları, Baş Prokurorluğun “İşin Təşkili Qaydaları”nı, Baş prokurorun əmr və tapşırıqlarını, eləcə də fəaliyyətinə aid olan digər normativ hüquqi sənədləri rəhbər tutaraq, prokurorluq işçilərinin nəzəri bilik və peşə hazırlığı səviyyəsinin yüksəldilməsi üçün stimullaşdırıcı tədbirlər həyata keçirmiş, müxtəlif növ tədris tədbirləri təşkil etmiş, elmi-nəzəri və praktiki təhlil və tədqiqatlar aparmış, elmi-tədqiqat sahəsində ölkədaxili və xarici tərəfdaşlarla əməkdaşlığı davam etdirmiş, mətbu nəşrlərin dövri buraxılışlarının hazırlanmasını təmin etmiş, prokuror fəaliyyətinin müxtəlif sahələrində müasir biliklərin, yeni informasiya kommunikasiya texnologiyalarının tətbiqi üçün müvafiq addımlar atmışdır.

Baş Prokurorluğun Fəaliyyət Planının icrası

Baş Prokurorluğun 2024-cü ilin birinci və ikinci yarımilinə dair Fəaliyyət Planlarında nəzərdə tutulmuş və icrasına məsul qurum kimi Mərkəz müəyyən edilmiş bütün tədbirlər vaxtında və tam icra edilmiş, digər struktur qurumların tədbirlərinin keçirilməsinə köməklik göstərilmişdir.
Belə ki, Baş Prokurorluğun 2024-cü ilin birinci yarımilinə dair Fəaliyyət Planının 7-ci bəndinə əsasən dövlət qulluqçuları üçün “Dövlət qulluğu haqqında qanunvericiliyin tətbiqi”, “Korrupsiyaya qarşı mübarizə sahəsində dövlət qulluqçularının vəzifə və öhdəlikləri” və “Dövlət qulluqçularının fəaliyyətinin qiymətləndirilməsi qaydaları” mövzuları üzrə təlimlər keçirilmiş; 8-ci bəndinə əsasən tabe rayon (şəhər) prokurorluqlarının işçiləri üçün “Etik davranışın qayda və prinsipləri, həmçinin onlara əməl edilməsi” mövzusu üzrə təlimlər keçirilmiş; 19-cu bəndinə uyğun olaraq isə tabe rayon (şəhər) prokurorluqların əməkdaşları üçün “Həkim səhvləri ilə bağlı məlumatlar üzrə istintaq-araşdırma təcrübəsi” mövzusunda kurs təşkil edilmişdir.
Baş Prokurorluğun 2024-cü ilin ikinci yarımilinə dair Fəaliyyət Planının 12-ci bəndinə əsasən Kadrlar idarəsi ilə birgə Ali məktəblərdə hüquqşünaslıq ixtisası üzrə təhsil alan tələbələrin prokurorluq orqanlarında işləmələrinin təşviqi üçün tədbirlər görülmüş; 25-ci bəndinə uyğun olaraq prokurorluq işçiləri üçün “Qanunsuz miqrasiyanın təşkili ilə bağlı məlumatlar üzrə istintaq-araşdırma təcrübəsi” mövzusunda kurs təşkil edilmişdir.

Mərkəzin İş planının icrası

Mərkəzin 2024-cü ilin birinci və ikinci yarımilinə dair İş planlarına əsasən görülmüş işlərin praktiki nəticələri tədris və maarifləndirmə prosesinə müsbət təsir göstərmiş, elmə və hüquqa əsaslanan təhlillərin aparılmasına və nəşrlərin hazırlanmasına şərait yaratmışdır.
Belə ki, Mərkəzin 2024-cü ilin birinci yarımilinə dair İş planının 2-ci bəndinə əsasən Rusiya Federasiyası Prokurorluğunun Universiteti ilə birgə “Qanunsuz miqrasiyanın qarşısının alınması üzrə MDB üzv dövlətləri prokurorluqlarının fəaliyyəti” mövzusunda elmi tədqiqat aparılmış; 3-cü bəndinə əsasən 2023-cü il ərzində Mərkəz tərəfindən aparılmış təhlil və tədqiqatlar əsasında (etik davranış qaydaları; şəxsi həyat anlayışı; tədris-təhsil qurumları) metodoloji və kriminoloji əhəmiyyət kəsb edən, eləcə də informativ xarakter daşıyan nəşr hazırlanmış; 4-cü bəndinə uyğun olaraq əməliyyat-axtarış fəaliyyəti orqanlarının əməkdaşları üçün “Narkotik vasitələrin və psixotrop maddələrin qanunsuz dövriyyəsi ilə əlaqədar cinayətlər üzrə əməliyyat-axtarış fəaliyyətinin xüsusiyyətləri və aktual problemləri” mövzusunda təlim təşkil edilmiş; 5-ci bəndinə əsasən insan alverinə və məişət zorakılığına qarşı mübarizəni, eləcə də uşaq hüquqlarının müdafiəsini ehtiva edən mövzular üzrə seminarlar keçirilmiş; 6-cı bəndinə uyğun olaraq prokurorluq orqanlarına 2023-cü ildə ilk dəfə qulluğa qəbul olunmuş və stajorluq keçən işçilər üçün hazırlıq kursu təşkil edilmişdir.
Mərkəzin 2024-cü ilin ikinci yarımilinə dair İş planının 2-ci bəndinə əsasən prokurorluq orqanlarının peşə hazırlığı, elmi-tədqiqat və metodiki iş sahəsində beynəlxalq əməkdaşlıq təcrübəsi təhlil edərək müvafiq nəşr hazırlanmış; 3-cü bəndinə uyğun olaraq Baş Prokurorluğun Ədliyyə, gömrük və vergi orqanlarının istintaq, təhqiqat və əməliyyat-axtarış fəaliyyətində qanunların icrasına nəzarət idarəsi ilə birgə məhkəmənin hökmünü, qərarını, yaxud digər aktını icra etməmə əməlinin cinayət-hüquqi xarakteristikası və istintaq təcrübəsi üzrə tədqiqat aparılmış; 4-cü bəndinə əsasən prokurorluq və daxili işlər orqanlarının əməkdaşları üçün “Cinayət təqibi zamanı uşaq hüquqlarının üstün mühafizəsi prinsipi” mövzusunda təlim təşkil edilmiş; 5-ci bəndinə görə cinayət yolu ilə əldə edilmiş gəlirlərin, cinayət alətlərinin və ya onların dəyərinə ekvivalent əmlakın, terrorizmin maliyyələşdirilməsində istifadə olunan vəsaitlərin həbs və müsadirəsinə dair təlim keçirilmiş; 6-cı bəndinə əsasən 2024-cü ildə prokurorluğa ilk dəfə qulluğa qəbul olunmaq üçün müsabiqədən müvəffəqiyyətlə keçmiş namizədlər üçün icbari təlim başlanmışdır.
Qeyd edilən planların ilk bəndlərində nəzərdə tutulmuş görülmüş işlərin təhlili və onların nəticələrinin idarənin əməliyyat iclaslarında müzakirə olunması təmin edilmişdir.

Digər proqram və planların icrası

Fəaliyyət və İş planları ilə yanaşı 2023-cü ilin birinci yarımili ərzində prokurorluğun fəaliyyəti ilə bağlı olan digər proqram və planlarda Mərkəzin üzərinə düşən vəzifələrin layiqincə yerinə yetirilməsinə səy göstərilmişdir.
Belə ki, Baş prokuror yanında Elmi-Məsləhət Şurasının 14.12.2023-cü il tarixli iclasının qərarı; Baş Prokurorluğun Kollegiya iclasının 26.12.2023-cü il tarixli qərarının 8-ci bəndi; Baş Prokurorluğun Geniş Kollegiya iclasının 26.01.2024-cü il tarixli qərarının 16 və 33-cü bəndləri; “Azərbaycan Respublikasının informasiya təhlükəsizliyi və kibertəhlükəsizliyə dair 2023 – 2027-ci illər üçün Strategiyası”nın  həyata keçirilməsi ilə bağlı Baş Prokurorluğun Tədbirlər Planının 4 və 4-1-ci bəndləri; “Cinayət yolu ilə əldə edilmiş əmlakın leqallaşdırılmasına və terrorçuluğun maliyyələşdirilməsinə qarşı mübarizəyə dair 2023 – 2025-ci illər üzrə Milli Fəaliyyət Planı”nın icrası ilə əlaqədar Baş Prokurorluğun 2024-cü il üzrə İş Planının 1.5.1 və 1.8-ci bəndləri; Azərbaycan Respublikasında 2024-cü ilin “Yaşıl dünya naminə həmrəylik ili” elan edilməsi ilə əlaqədar Baş Prokurorluğun Tədbirlər Planının 4, 10 və 19-cu bəndləri; Baş Prokurorluğun Geniş Kollegiya iclasının 22.07.2024-cü il tarixli qərarının 5 və 18-ci bəndləri; “Prokurorluq işçilərinin peşə bayramı günü və prokurorluq orqanlarının yaradılmasının 106-cı ildönümünün qeyd edilməsi ilə əlaqədar” Tədbirlər Planının 7 və 8-ci bəndləri; Baş Prokurorluğun Geniş Kollegiya iclasının 08.10.2024-cü il tarixli qərarının 3 və 11-ci bəndləri; 19.11.2024-cü ildə keçirilmiş Baş Prokurorluğun əməliyyat müşavirəsinin 6-cı bəndi; “Korrupsiyaya qarşı mübarizənin gücləndirilməsinə dair 2022 – 2026-cı illər üçün Milli Fəaliyyət Planı” üzrə Tədbirlər Planının 5.1, 6.2 və 6.4-cü bəndləri; “Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramı”nın 3.6 və 4.13-cü bəndləri; “Uşaqlara dair Strategiyanın həyata keçirilməsi üzrə 2020 – 2025-ci illər üzrə Fəaliyyət Planı”nın 5.3.15-ci bəndi; “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2019 – 2024-cü illər üçün Dövlət Proqramı”ndan irəli gələn tədbirlər vaxtında və tam icra edilmişdir.
Bundan başqa, cari ildə digər tədbirlərin həyata keçirilməsi təmin edilmişdir. Məsələn, Qarabağın işğalı və Qarabağ müharibələri ilə əlaqədar 104 cinayət işi üzrə müvafiq arayışlar hazırlanaraq Baş Prokurorluğun İstintaq idarəsinə təqdim edilmişdir.